സമൃദ്ധമായ പച്ചപ്പും നിർമ്മലമായ ചുറ്റുപാടുകളുമുള്ള നാഗാലാൻഡിലെ കൊനോമ ഗ്രാമം ഓരോ സഞ്ചാരിയും തീർച്ചയായും സന്ദർശിക്കേണ്ട ഒരിടമാണ്. ബഹളമയമായ രാത്രിജീവിതമോ തിരക്കേറിയ വിനോദസഞ്ചാര കേന്ദ്രങ്ങളോ ഇവിടെയില്ല. മറിച്ച്, മാലിന്യം കുറയ്ക്കാനും സുസ്ഥിരമായി ജീവിക്കാനും പരസ്പര വിശ്വാസത്തിലധിഷ്ഠിതമായ ഒരു സമൂഹം കെട്ടിപ്പടുക്കാനും ഈ ഗ്രാമം ലോകത്തിന് മാതൃകയാകുന്നു.

കച്ചവടക്കാരില്ലാത്ത കടകൾ

കൊനോമയിലെ ഏറ്റവും അത്ഭുതകരമായ കാഴ്ച അവിടുത്തെ കടകളാണ്. മിക്ക കടകളിലും കച്ചവടക്കാരുണ്ടാകില്ല. ഓരോ സാധനത്തിനും വില രേഖപ്പെടുത്തിയിട്ടുണ്ടാകും. സാധനം ആവശ്യമുള്ളവർ അത് എടുക്കുകയും പണം അവിടെ വെച്ചിട്ടുള്ള പെട്ടിയിൽ ഇടുകയും ചെയ്യുന്നു. ആരും തങ്ങളെ വഞ്ചിക്കില്ലെന്ന ഉറച്ച വിശ്വാസമാണ് ഈ ഗ്രാമവാസികൾക്കുള്ളത്.

മാത്രമല്ല, ഇവിടുത്തെ വീടുകൾക്ക് പലപ്പോഴും പൂട്ടുകളുണ്ടാകാറില്ല. ഗ്രാമത്തിലെ കമ്മ്യൂണിറ്റി ലൈബ്രറിയിൽ നിന്ന് ആർക്കും പുസ്തകങ്ങൾ എടുക്കാം, വായിച്ചശേഷം തിരികെ നൽകാം. പുസ്തകങ്ങൾ സംഭാവന ചെയ്യാനും ഇവിടെ സൗകര്യമുണ്ട്.

ഇന്ത്യയിലെ ആദ്യത്തെ ഹരിത ഗ്രാമം

1998-ൽ ‘കൊനോമ നേച്ചർ കൺസർവേഷൻ ആൻഡ് ട്രാഗോപൻ സാങ്ച്വറി’ സ്ഥാപിതമായതോടെയാണ് കൊനോമ ഇന്ത്യയിലെ ആദ്യത്തെ ഹരിത ഗ്രാമമായി അറിയപ്പെടാൻ തുടങ്ങിയത്.

ഗോത്രവർഗ്ഗക്കാർക്കിടയിൽ നിലനിന്നിരുന്ന വേട്ടയാടൽ 1998-ൽ ഈ ഗ്രാമം നിരോധിച്ചു. വനവിഭവങ്ങളും കൃഷിയും കന്നുകാലിവളർത്തലുമാണ് ഇന്ന് അങ്കാമി നാഗാ വിഭാഗത്തിൽപ്പെട്ട ഇവിടുത്തെ ജനങ്ങളുടെ പ്രധാന വരുമാനമാർഗ്ഗം. 2011-ലെ സെൻസസ് പ്രകാരം 1,900-ൽ താഴെയാണ് ഇവിടുത്തെ ജനസംഖ്യ. ഏകദേശം 424 വീടുകൾ മാത്രമാണ് ഈ ചെറിയ ഗ്രാമത്തിലുള്ളത്.

മനോഹരമായ പ്രകൃതിദൃശ്യങ്ങൾ, ഗൈഡഡ് നേച്ചർ വോക്ക്, ട്രെക്കിംഗ് എന്നിവ ഇവിടെ ആസ്വദിക്കാം.

കൊനോമ കോട്ട: 19-ാം നൂറ്റാണ്ടിൽ അങ്കാമി നാഗാ ഗോത്രക്കാർ ബ്രിട്ടീഷുകാർക്കെതിരെ പോരാടിയ ചരിത്രപ്രസിദ്ധമായ ഇടമാണിത്. നിർബന്ധിത തൊഴിലിനെതിരെയായിരുന്നു ഈ പോരാട്ടം.

വലിയ നഗരങ്ങളിലെ മലിനവായുവിൽ നിന്നും ഗതാഗതക്കുരുക്കിൽ നിന്നും മാറി, ശാന്തവും സുന്ദരവുമായ ഒരു ജീവിതരീതിയാണ് കൊനോമ കാഴ്ചവെക്കുന്നത്. സാമൂഹിക ഉത്തരവാദിത്തത്തിന്റെയും സുസ്ഥിര ജീവിതത്തിന്റെയും പാഠങ്ങൾ ഈ ഗ്രാമം നമ്മെ പഠിപ്പിക്കുന്നു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi